என்னவென்று சொல்ல...

சாந்திநிகேதன் அருங்காட்சியகத்திலிருந்து இரவீந்திரநாத் தாகூர் பெற்ற நோபல் பரிசு களவுபோயுள்ளது பற்றி நாளிதழ்கள் அனைத்திலும் நேற்று செய்தி வந்திருந்தது. சாதாரணத் திருட்டுகள் சர்வசாதாரணமாக நடப்பதால் (ஆளை வெட்டி நடக்கும் கொள்ளைகள் கூட) அதில் ஆச்சரியப்பட ஒன்றுமில்லை. ஆனால் இத்திருட்டு மகாக் கேவலமான ஒன்று. நம் நாட்டிற்குக் கிடைத்த அற்புதமான மனிதர்களில் ஒருவருக்கு வழங்கப்பட்ட ஒரு சர்வதேச அங்கீகாரத்தைக் களவாடித் தங்களை அசிங்கப்படுத்திக் கொண்டுள்ளனர் என்றுதான் சொல்லவேண்டியுள்ளது.

யார்தான் எதிர்பார்த்திருப்பார்கள் இப்படியொரு திருட்டு நடந்திருக்குமென்று! அம்மாநிலக் காவல்துறை விரைவில் களவாளர்களைக் கண்டுபிடித்து இழந்த பொருளை மீட்பார்கள் என எதிர்பார்ப்போம்.

ஷேக் யாசின் படுகொலை

பாலஸ்தீனத்தில் இன்று ஒரு படுகொலை நடந்துள்ளது. ஹமாஸ் என்ற அமைப்பை நிறுவியவரும், மதத் தலைவருமான ஷேக் யாசின் (67) காஸாவில் இஸ்ரேலியர்களின் ஹெலிகாப்டர் குண்டுவீச்சுத் தாக்குதலில் கொல்லப்பட்டுள்ளார். யாசர் அராஃபாத்திற்கு அடுத்த படியாக பாலஸ்தீனர்களிடையே பிரபலமடைந்தவர் இவர் உடலால் ஊனமுற்றவரும்கூட. சென்ற ஆண்டில் ஒருமுறை நடந்த தாக்குதலில் தப்பியவர்.

இஸ்ரேலிய ஆக்கிரமிப்பிற்கு எதிராக ஹமாஸ் அமைப்பு தேர்ந்தெடுத்த பாதை வன்முறை - பெரும்பாலான தற்கொலைத் தாக்குதல்களுக்கு இது பொறுப்பேற்றுள்ளது. இஸ்ரேலியர்களின் மீதான தாக்குதல்களுக்கு நேரடியாகவும், மறைமுகமாகவும் யாசின் தூண்டுகோலாக இருப்பதால், அவரை முடித்துவிட்டனர். இப்படுகொலை நடந்த காலகட்டம் மிக முக்கியமானது. ஷரோன் (இஸ்ரேலியப் பிரதமர்), காஸா பகுதியிலுள்ள சில ஆக்கிரமிப்புகளை விலக்கிக் கொள்வதாக அறிவித்திருந்தார். "இஸ்ரேல் இங்கிருந்து கொஞ்சம் விலகிக் கொள்ள பாலஸ்தீனர்கள் கொடுக்க வேண்டிய விலை தான் இன்றைய படுகொலையோ" என்று ஒரு பத்திரிக்கையில் விமர்சித்துள்ளனர்.

எது எப்படியிருப்பினும் இப்படுகொலை மேலும் வன்முறையையே ஊக்குவிக்கப்போகிறது. வரும் நாட்களை நினைத்துப் பார்க்க அச்சமாயுள்ளது.

ஐநா, ஐரோப்பியக் கூட்டமைப்பு, ரஷ்யா ஆகியவை இத்தாக்குதலை வன்மையாகக் கண்டித்துள்ளன. 'இஸ்ரேலுக்கு தனது நாட்டைக் காத்துக் கொள்ளும் பொறுப்பு உள்ளது' - இது அமெரிக்கா. ஏனெனில் "நாளை பின்-லாடனை இப்படி தீர்த்துக் கட்ட வேண்டியிருப்பதால், இன்று ஷரோனைக் கண்டிப்பது முரணாக இருக்காதா பின்னே!".

எல்லா இடங்களிலும் "பயங்கரவாதத்திற்கு எதிரான போர்" என்று சொல்லிக்கொண்டு ஆள்வோர் எதிரிகளைத் தீர்த்துக்கொண்டுள்ளனர். படைபலமும், அதிகாரமும் இருந்தால் போதும் இதற்கு. என்றுதான் விடிவுகாலமோ! :(

பேரழிவு தவிர்க்கமுடியாதது!

SharpReader-வுடன் வந்த சில RSS ஓடைகளில் Wired News-ம் ஒன்று. இன்று அதில் வந்த ஒரு செய்தி: பிரிட்டனில் நடந்த ஒரு கணிப்பில், கடந்த 40 ஆண்டுகளில் 54 சதவீதப் பறவைகளும், 28 சதவீதத் தாவரங்களும், அதிர்ச்சியளிக்கும் வகையில் 71 சதவீத வண்ணத்துப்பூச்சிகளும் அழிந்து விட்டன என்று தெரியவந்துள்ளது. இதுபோன்ற செய்திகள் தற்காலங்களில் கேட்பதற்குப் புதிதல்லவெனினும் வருத்தமளிக்கக்கூடியது. இப்பரந்துபட்ட உலகில் உயிரினங்கள் தொடர்ந்து வாழ அவரவர் தம்மால் ஆனதைச் செய்துகொண்டேயிருக்க வேண்டியதுதான்.

முதல் எதிர்வினை

மைக்ரோசாஃப்ட்டின் தமிழ்க் கலைச்சொல் திட்டம் குறித்த தனது கருத்தைத் திண்ணையில் ஆசாரகீனன் எழுதியுள்ளார்.

ஹாலிவுட்டின் புது வரவும் சர்ச்சைகளும்

சொந்தப்பணமாக கிட்டத்தட்ட $30 மில்லியன்களைப் போட்டு சுமார் $350 மில்லியன்களை வழித்திருக்கிறார் என்று ஒரு கூட்டம்; இரத்தக் கறை வடியும் கிராஃபிக் குப்பை என்று ஒரு கூட்டம்; தங்களது இனம்தான் அவரது மரணத்திற்கு காரணமென்று தவறான தகவல்களைச் சொல்வதாக ஒரு கூட்டம்; அப்படியெல்லாம் ஒன்றுமில்லை இருந்ததைத்தான் பிரமாதமாகக் காட்டியுள்ளனர் என்று ஒரு கூட்டமும் இப்படத்தைப் பற்றிப் புலம்பியும், சிலாகித்தும், திட்டிக் கொண்டும் உள்ளனர். இது தற்போதைக்கு வெளியாகியுள்ள அமெரிக்கக் கண்டத்தில் மட்டுமே! ஐரோப்பாவிற்கு இந்த மாத இறுதியிலும், அடுத்த மாதத்துவக்கத்திலும் வரவுள்ளது. ஆனாலும் கூட்டங்களின் குரல்கள் ஒலிக்க ஆரம்பித்துவிட்டன.

ஸ்பானியத் தேர்தல் முடிவுகள்

சென்ற வாரத்தில் ஸ்பெயினில் நடந்த குண்டு வெடிப்புகளின் தாக்கம் கடந்த ஞாயிறு நடைபெற்ற பொதுத் தேர்தல்களில் எதிரொலித்துள்ளது. ஆளும் 'பாப்புலர் பார்ட்டி'யிடமிருந்து சோஷலிஸ்டுகள் ஆட்சியைக் கைப்பற்றியுள்ளனர். ஈராக் போருக்கு பலியான முதல் ஆட்சி. பிரதம மந்திரியாக வரவிருப்பவர் Jose Luis Rodriguez Zapatero.

சனிக்கிழமை இரவு மாட்ரிட்டில் உள்ள 'பாப்புலர் பார்ட்டி'யின் தலைமை அலுவலகத்திற்கு முன்பு மக்கள் இக்கட்சி சுயநலத்திற்காக குண்டுவெடிப்பு பற்றிய உண்மைகளை மறைப்பதாகக் குற்றம் சாட்டி ஆர்ப்பாட்டம் நடத்தினர். அன்றிரவுதான் உள்துறை அமைச்சர் ஐந்து பேரைக் கைது செய்துள்ளதாக அறிவித்தார் (3 மொராக்கியர்கள், 2 இந்தியர்கள்).

வெற்றி பெற்றதும் Zapatero, ஜூன் 30ற்குள் ஈராக்கின் நிலைமையில் மாற்றம் ஏதும் ஏற்படாவிடில் (ஐநாவிடம்/ஈராக்கியர்களிடம் பொறுப்பை ஒப்படைத்தல்) அங்குள்ள தனது நாட்டுத் துருப்புகளைத் திரும்ப அழைப்பதாக அறிவித்துள்ளார். (ஈராக் போரையும், அரசாங்கம் அச்சமயத்தில் எடுத்த நிலைப்பாட்டையும், போருக்குப் பின்பு அங்கு படைகளை அனுப்பியதையும் பெரும்பாலான ஸ்பானிய மக்கள் விரும்பவில்லை.)

படைகளைத் திரும்பப் பெறும் இம்முடிவை பல சாதகபாதகங்களைக் கொண்டது.

ஆதரிப்போர் :
1. இப்போருக்கு அரசு ஆதரவளித்ததனால்தான் குண்டுவெடிப்பு நிகழ்ந்தது, ஆகவே படைகளைத் திரும்ப வரவழைத்தலே நல்லது.
2. மேலும் தாக்குதல்களைத் தவிர்க்கலாம்.

விமர்சிப்போர்:
1. படைகளைத் திரும்ப அழைத்தால் பயங்கரவாதிகளது செயலுக்கு 'வெற்றி' கிடைத்ததாக ஆகிவிடும். இதுபோல் மேலும் மேலும் தாக்குதல் நடத்த முயற்சிப்பார்கள்.
2. மற்ற நாடுகளும் வருங்காலத்தில் தமது ஆட்சியைக் காப்பாற்றிக்கொள்ள தங்களது படைகளை திரும்ப அழைக்கலாம்.
3. கூட்டணிப்படைகள் வெளியேறுவதால் ஈராக்கிலுள்ள நிலைமை மோசமைடயக் கூடும்.

மேற்கண்ட நிலையை அமெரிக்கா நிச்சயம் விரும்பாது. பார்ப்போம்.

ஸ்விஸ் பட்டாளக் கத்தி

ஸ்விஸ் நிறுவனமான VICTORINOX-ன் பைக்கத்திகள், குறிப்பாக "Swiss Army Knives", மிகவும் பிரசித்தமானவை. இவற்றில் கத்தி, திருப்புளி, ரம்பம், கத்தரிக்கோல், அரம், பல்குத்தி, கடிகாரம், பேனா, முட்கரண்டி, திசைகாட்டி, டப்பா திறப்பான், சிறு விளக்கு, அது இதுவென்று என்னென்னவெல்லாமோ சேர்த்து பல வடிவங்களில் விற்பனைக்குவிட்டுள்ளனர். இந்த வரிசையில் புதிதாகச் சேர்ந்துள்ள வஸ்து USB நினைவகமாகும்.

ஹான்னோவரில் (ஜெர்மனி) இம்மாதம் 18-23ல் நடக்கும் CeBIT இப்புதுச்சரக்கு அரங்கேறுகிறது. தொடக்கத்தில் 64MB மற்றும் 128MB அளவுகளுடன் உள்ளூரில் சுற்றுவதற்கு கத்தி கபடாக்களுடன் (கபடா என்றால் என்ன?) ஒரு மாடலும் (மாடலுக்கு தமிழில்... வடிவம்? ம்ஹும்..), விமானத்தில் பயணம் செய்ய அவை இல்லாமல் ஒரு மாடலும் சந்தைக்கு வருகின்றனவாம். USB நினைவகம் ஏற்கனவே இல்லாதவர்கள் ஒன்று வாங்க முயற்சிக்கலாம். விலை? 64MB அளவுள்ளது, €55 என்று ஒரு வலைப்பக்கத்தில் கண்டேன். இதன் தரவுத்தாளை (datasheet) இங்கே சென்று காணுங்கள்.

மாட்ரிட் ரயில் குண்டுவெடிப்புகள்

மாட்ரிட் நகர ரயில்களில் நேற்று காலை நடந்த தொடர் குண்டு வெடிப்புகளில் கிட்டத்தட்ட இருநூறு பேர் பலியாகியுள்ளனர், இன்னும் பலரது நிலைமை கவலைக்கிடமாக இருப்பதாகச் செய்திகள் வருகின்றன. காயம்பட்டோர் ஆயிரக்கணக்கில்! என்ன பாவம் செய்தார்கள் அப்பாவிப் பொதுமக்கள்? தங்களுக்கு இப்படி ஒரு நிகழ்ச்சி நடக்குமென்று கனவில்கூட யாரும் நினைத்துப் பார்த்திருக்கமாட்டார்கள். அவரவர்பாட்டுக்கு காலையில் தங்கள் அலுவல்களுக்கு சென்று கொண்டிருந்தவர்கள் ரத்தமும் சதையுமாக ஓடவேண்டிய நிலைக்குத் தள்ளப்பட்டுள்ளனர். எத்தனையோ குடும்பங்கள் துயரத்தில் தத்தளித்துக்கொண்டுள்ளன.

ஸ்பெயின் நாடு முழுவதும் நடந்து கொண்டிருந்த தேர்தல் பிரச்சாரம் உடனடியாக நிறுத்தப்பட்டுள்ளது. பங்குச்சந்தைகளில் (குறிப்பாக சுற்றுலா மற்றும் விமான நிறுவனங்களின் பங்குகள்) சரிவு (இன்று ஓரளவிற்கு இயல்பு நிலைக்குத் திரும்பி விட்டதாம்!). இன்றைக்கு ஸ்பெயின் நாட்டின் பல நகரங்களில் இப்பயங்கரவாதத் தாக்குதல்களைக் கண்டித்து மாபெரும் பேரணிகள் நடந்து கொண்டுள்ளன (தொ.காவில் அவ்வப்பொழுது சிலநிமிடங்கள் நேரடியாக ஒளிபரப்புகின்றனர்).

இப்பாதகச் செயலைச் செய்தது யார்? அங்குள்ள மக்கள், அரசியல்வாதிகளால் உடனடியாகச் சுட்டப்படுவது ETA எனப்படும் உள்நாட்டுப் பிரிவினைவாத அமைப்பாகும். அதன் வரலாறு இரத்தக் கரைகளால் நிரம்பியது. இவ்வமைப்போ தாங்கள் செய்யவில்லையென்று மறுத்துள்ளது. ஆனாலும் அந்நாட்டு அரசு இவ்வமைப்பை பலமாகவே சந்தேகிக்கிறது. இத்தாக்குதல்களை உலகலாவிய பயங்கரவாத அமைப்பான அல்-கயிதா நடத்தியிருக்கக்கூடுமென்ற கருத்தும் நிலவுகிறது. விரைவில் உண்மை தெரியவருமென்று நம்புகிறேன்.

இத்தகைய கண்மூடித்தனமான தாக்குதல்களை நடத்தி அப்பாவி மக்களைக் கொன்று என்ன சாதிக்கப்போகின்றன இவ்வமைப்புகள்? எந்தக் காரணத்தைக் கூறியும் இதை நியாயப்படுத்தவே முடியாது. இவ்வலைப்பதிவு பலியானவர்களின் அஞ்சலிக்காக கனத்த மனதுடன் வைக்கப்படும் ஒரு சிறு மலர்க்கொத்து.

யாழ்

தமிழறிந்த அனைவருக்கும் பரிச்சயப்பட்ட வார்த்தையிது. யாழ் என்ற ஓர் இசைக்கருவி தமிழ்ச் சமுதாயத்தில் ஒரு காலத்தில் கோலோச்சியிருக்க வேண்டும். இல்லையெனில் பேரி யாழ், மகர யாழ், செங்கோட்டி யாழ் ....(என்று 7 அல்லது 8ம் வகுப்பில் உருப்போட்டதாக ஞாபகம், மற்றவை மறந்துவிட்டது) என்று பலவகைகள் இருந்திருக்க வாய்ப்பில்லை. யாழர்கள், யாழினிகள் என்று ஒரு கூட்டமும் இருந்திருக்கலாம்.

தமிழ் கூறும் நல்லுலகில் இருந்த இந்த யாழ் எப்படி வழக்கொழிந்து போனது?
இது அயலிலிருந்து இறக்குமதியான கருவியா இல்லை தமிழர்களே உருவாக்கிய ஒன்றா?
ஆங்கிலத்தில் Harp எனப்படும் கருவிக்கும் யாழுக்கும் ஏதேனும் சம்பந்தம் உண்டா? [இந்த Harp, உலகின் பல நாடுகளில் பல்வேறு வடிவங்களில் பல நூற்றாண்டுகளாக வழக்கில் இருக்கும் கருவியாம். (உபயம்:கூகிள் தேடியந்திரம்)]

விபுலானந்த அடிகள் என்பவர் கிட்டத்தட்ட பதினான்கு ஆண்டுகள் உழைத்து 1947-ல் யாழ் நூல் என்ற புத்தகத்தை வெளியிட்டதாக இந்த இணையப்பக்கம் தெரிவிக்கிறது. ஒருவேளை மேற்கண்ட கேள்விகளுக்கு இதில் பதில் இருக்கலாம். இப்புத்தகம் ஏதாவது நூலகத்தில் தூசியைத் தாங்கிக் கொண்டிருக்கும். தற்போது விற்பனையில் எங்காவது உள்ளதா என்று பார்க்கவேண்டும்.

பாரதிதாசன் காலத்தில் இக்கருவி இருந்திருக்கிறதா? "துன்பம் நேர்கையில் யாழெடுத்து நீ இன்பம் சேர்க்கமாட்டாயா?" என்று அவ்விசையைக் கேட்காமல் எப்படி எழுதியிருப்பார்? (வீணையே யாழின் ஒருவடிவம் என்கிறார்கள், ஒருவேளை அதைச் சொல்லியிருப்பரோ?)

மைக்ரோசாஃப்ட் தமிழ்க் கலைச்சொல் அகராதித் திட்டம்

தமிழா! மடலாற்குழுவிற்கு திரு.மாலன் அவர்களிடமிருந்து இன்று வந்த ஒரு மின்னஞ்சல் பின்வருமாறு:
"மென்பொருட்களில் பயன்படும் ஆங்கிலச் சொற்களைத் தமிழில் மொழிபெயர்ப்பது, அந்தக் கலைச்சொற்களைக் கொண்டு ஓர் அகராதி உருவாக்குவது, பின்னர் அவற்றைக் கொண்டு விண்டோஸ், MS ஆபீஸ் ஆகியவற்றைத் தமிழ்ப்படுத்துவது என்ற ஒரு திட்டத்தை மைக்ரோசாஃப்ட் நிறுவனம் செயல்படுத்த உள்ளது. அது குறித்த அறிவிப்பை இந்த முகவரியில் நீங்கள் காணலாம். http://www.bhashaindia.com/CGW/TA/Tamil.aspx

இந்தத் திட்டத்தில் பங்கேற்க வருமாறு உங்களை அன்போடு அழைக்கிறேன்".

இவ்வளவு பெரிய நிறுவனம் எதற்கு தன்னார்வலர்களை எதிர்நோக்குகின்றதென்று புரியவில்லை! விஷயம் தெரிந்தவர்கள் இதுபற்றி விவாதிப்பார்களென எதிர்நோக்குகிறேன்.

பந்தயம்

மின்னஞ்சலாக வந்த வழங்கல் காட்சி ஒன்றின் உரை, ஒரு தமாஷுக்கு (நிசத்திலும் இப்படி இருக்கலாம், சில இடங்களில்):

Once upon a time there was an Indian rowing team.

India and Japan agreed to do an annual rowing race. Each team should contain 8 men.

Both teams worked really hard to get in the best shape. The day the race started both teams were in similar condition. ...the Japanese won by 1 mile.

The mood in the Indian team was really close to the freeze point. The top management decided to win the race next year. So they established a team of analysts to observer the situation and recommend an appropirate solution.

After several detailed analysis the team found out that Japanese had 7 rowers and only one captain.

Ofcourse the Indian team had 7 captains but only one rower.

Facing such critical scenario the management showed an unexpected wisdom: they hired a consulting company to restructure the Indian team.

After several months the consultants came up with the conclusion that there were too many captains and too few rowers in the Indian team. A solution was proposed based on this analysis: the structure of the Indian team has to be changed!

As of today there will be only 4 captains in the team led by 2 managers, one top-manager and one rower. Besides that, they suggested to improve the rower's working environment and to give him higher competencies.

Next year the Japanese won by 2 miles.

The Indian team immediately displaced the rower from the team based on his unsatisfactory performance.

But the bonus award was paid to the management for the strong motivation to the team showed during the preparation phase.

The consulting company prepared a new analysis, which showed that the strategy was good, the motivation was OK, but the used tool has to be improved.

Currently the Indian team is designing a new boat.

"தன்-சா-வூர்"

மகாமகச் செய்திகளால் கும்பகோணம் அடிக்கடி கண்ணில் தென்படுகிறது. கும்பகோணம் என்றதும் மகாமகம் நினைவுக்கு வருகிறதோ இல்லையோ ஸ்ரீனிவாச ராமானுஜன் வருகிறார். இந்தியா, உலகிற்கு அளித்த பொக்கிஷங்களில் ஒருவரான அவரது வரலாற்றை Robert Kanigel என்பவர் The Man Who Knew Infinity - A life of the genius Ramanujan எழுதிய புத்தகத்தில் முன்பு படித்தது. கும்பகோணத்தில் தொடங்கி, சென்னை, கேம்பிரிட்ஜ் என்று ராமானுஜன் வாழ்வில் வரும் பல ஊர்களையும், பல மனிதர்களையும், நிகழ்ச்சிகளையும் விவரிக்கும் நேர்த்தியான ஒரு புத்தகம் இது.

"கொடிது கொடிது இளமையில் வறுமை" எவ்வளவு உண்மையானது ராமானுஜன் வாழ்வில்! நல்ல மனிதர்கள் சிலரால் உலகிற்கு அறியப்பட்டார். கடும் உழைப்பும், திறமையும் மட்டும் போதாது, அங்கீகாரம், சிபாரிசுகள், அதிர்ஷ்டம் எல்லாமும் வெற்றிபெறத் தேவைப்படுகின்றன. அன்றிருந்த சூழ்நிலைகளின் காரணமாக இளமையிலேயே உடல்நிலை பெரிதும் பாதிக்கப்பட்டு அற்ப ஆயுளில் உயிர் துறந்திருக்கிறார். கணித உலகம் அவரை முழுமையாகப் புரிந்துகொள்ள இன்னும் முயன்று கொண்டுள்ளது.

(நோய்வாய்ப்பட்ட தன் வாழ்நாளின் கடைசி காலத்தில்கூட ஒருகட்டத்தில் அம்மேதை தஞ்சாவூரை நகையாக விளித்த வண்ணம்தான் மேலுள்ளது.)

வம்புக்கு வேட்டு

மதுரை சட்டக் கல்லூரியில் இளம் வகுப்பு மாணவர்களை வம்பு [Rag-ற்கு சரியான தமிழ்ச்சொல் தெரியவில்லை :( - சீண்டல், கேலி, வம்பு?] செய்து துன்புறுத்தியது தொடர்பாக பதினெட்டு மாணவர்களை சம்பந்தப்பட்ட நிர்வாகம் கல்லூரியிலிருந்தே நீக்க உத்தரவிட்டுள்ளது. இதுபோன்ற கடுமையான நடவடிக்கைகள் தேவையென்றேபடுகிறது. மாணவர்கள் பெரும்பாலும் குழுவாகச் சேரும்போதுதான் தங்களது 'வீர'த்தைக் காண்பிக்கின்றனர். தங்களது சிந்தனைகளைப் படிப்பிலும் எதிர்காலத்தை நோக்கியும் செலுத்துவதை விட்டுவிட்டு இம்மாதிரி வம்புதும்புகள் செய்வது அவர்களுக்கு நன்மை பயக்காது. மாணவர்கள் தங்களுக்குள் கேலி செய்ய வேண்டியதுதான், ஒரு வரைமுறை என்று உண்டல்லவா!

வன்முறையால் மதுரைப் பகுதி பொருளாதார ரீதியில் மற்ற நகரங்களைவிட பின்தங்கியுள்ளதைப் பற்றி யாரும் கவலை கொள்வாரில்லை. இவ்விமரிசனக் கட்டுரையில் மதுரை பின் தங்க ஆரம்பித்தமைக்கான குறிப்பு காணப்படுகிறது.

இந்திய ஊழல் சாதனை

இந்த ஊழல் முன் நடந்தவற்றையெல்லாம் எடுத்து விழுங்கிவிட்டது. இத்தனை கோடி ரூபாய் அளவிற்கு ஊழல் நடந்துள்ளது என்று யாராலும் சரியாகச் சொல்லிவிட முடியுமா என்று இன்னும் தெரியவில்லை. ஒவ்வொரு நாளும் தொகை ஏறிக்கொண்டேபோகிறது. சம்பந்தப்பட்ட நபர்களின் பெயர்களும் புதிதாக வெளிச்சத்துக்கு வந்துகொண்டே உள்ளன. இவ்வரலாற்று ஊழல் தொடர்பான விஷயங்களை இங்கே தொகுத்து வருகின்றனர்.

வேலிகளே ஒவ்வொரு மாநிலத்தின் 'பயிர்'களையும் மேய ஆட்டுக்காரனுக்கு உதவியுள்ளன. என்னே ஒரு ஒற்றுமை இதில், அட அட! போடுங்க ஒரு பெரிய சல்யூட். காசைக் கொடுத்தால் தான் காக்கும் நகரங்களையேகூட விற்றுவிடுவார்கள் போலுள்ளது. அந்த அளவிற்கு ஊழல் தொகைகளெல்லாம் கோடிகளில் புழங்குவது சர்வ சாதாரணமாகிவிட்டது; ரூபாய்க்கு மதிப்பே இல்லையோ! ம்... அப்புறம், தமிழகத்தின் பங்கு மாத்திரம் இல்லாமல் இருந்தால் எப்படி, இங்குள்ளவர்கள் மட்டும் அவ்வளவு சளைத்தவர்களா என்ன!

இவ்வளவு பெரிய ஊழலையும் பத்தோடு பதினொன்றாக எடுத்துக் கொண்டு மறுநாள் வேலையைப் பார்க்க நம்மால் மட்டுமே முடியும். "இந்தியா ஒளிர" வேண்டாமா!

விமான விபத்துகள்

இந்திய விமானப்படை விமானங்கள் பயிற்சியின்போது விபத்தில் சிக்கி நொறுங்குவது அடிக்கடி நிகழ ஆரம்பித்துவிட்டது. அதுவும் குறிப்பாக மிக் ரக விமானங்கள். இன்றும் ஒன்று. விமானங்களின் கோளாறா இல்லை பயிற்சிக் குறைபாடா என்று தெரியவில்லை. பெரும் பொருட் சேதமடைவதுடன், உயிரிழப்புகளும் தேவையின்றி நிகழ்கின்றன. இவற்றைத் தவிர்க்க வேண்டும். ஏற்கனவே "இந்திய விமானப்படை விமானங்களை நாம் தாக்க வேண்டியதில்லை, அவர்களாகவே விழுந்துவிடுவார்கள்" என்று பக்கத்து நாட்டு நண்பர்கள் கிண்டலடித்துக் கொண்டுள்ளதாக சமீபத்தில் எங்கோ படித்த ஞாபகம்.

--------------------------------------------------
இன்று வந்த ஒரு மின்னஞ்சலிலிருந்து ஒரு பகுதி:

> Special People......And they call some of these people "retarded"
>
> ..A few years ago, at the Seattle Special Olympics, nine
> Contestants, all physically or mentally disabled, assembled at the
> starting line for the 100-yard dash.
>
> At the gun, they all started out, not exactly in a dash, but with a
> relish to run the race to the finish and win. All, that is, except
> one little boy who stumbled on the asphalt, tumbled over a couple of
> times, and began to cry. The other eight heard the boy cry. They
> slowed down and looked back. Then they all turned around and went
> back......every one of them.
>
> One girl with Down's Syndrome bent down and kissed him and said,
> "This will make it better." Then all nine linked arms and walked
> together to the finish line. Everyone in the stadium stood, and the
> cheering went on for several minutes. People who were there are still
> telling the story.
>
> Why?
>
> Because deep down we know this one thing: What matters in this life
> is more than winning for ourselves. What matters in this life is
> helping others win, even if it means slowing down and changing our
> course.

"தமிழ்நாட்டுப் பறவைகள்"

டேவிட் ஆட்டன்பரோவின் 'The Life of Birds'-ஐ வாசித்த சமயத்தில், தமிழிலும் இப்படி ஒரு புத்தகம் இருந்தால்....என்று ஏங்கியதுண்டு. இந்த அளவிற்கு நேர்த்தியான, அரிய புகைப்படங்கள், ஆழமான செய்திகளுடன் ஒரு புத்தகத்தைத் தரமாகப் பதிப்பதென்பது சுலபமான காரியமல்ல என்று தோன்றுகிறது. நமக்குள்ள திறமை குறைவு காரணமல்ல, வாய்ப்புகளும், வசதிகளும் இல்லாததுமே முக்கியமான காரணம் என்று நினைக்கிறேன். ஆர்வமும் குறிப்பிடப்படவேண்டிய ஒன்று. இன்றைய வாழ்க்கையில் பறவைகளைப் பார்க்கவேறு நேரம் இருக்கிறதா நம் மக்களுக்கு! இருப்பினும் ஹிந்து பத்திரிக்கையின் புத்தக மதிப்புரைப் பகுதியில் தமிழ்நாட்டுப் பறவைகள் என்ற தலைப்புடன் ஒரு மதிப்புரையைக் கண்டவுடன் மகிழ்வேற்பட்டது. தமிழில் இம்மாதிரியான பல்துறைப் புத்தகங்கள் அடிக்கடி வந்தால் நன்றாயிருக்கும். ஊருக்குச் செல்லும்போது வாங்கிப் படிக்கத் திட்டம்.

பறவைகளைக் காண்பது சுகமான அனுபவம். ஆளரவமற்ற குளத்தில் மீனைப் பார்த்துக் காத்திருக்கும் ஒற்றைக் கொக்கு, மாலை நேரத்தில் கூட்டமாய்ப் பறந்து பறந்து வட்டமடித்து மரத்தில் அமரும் ஒரு வகையான குருவிகள் (இவற்றின் பெயர் தெரியாத அளவிற்கு நம் புலமை உள்ளது! ம்..), புழுதியில் குளித்துச் சிலிர்த்துப் பறக்கும் சிட்டுக் குருவிகள், குழாயில் ஒழுகும் நீரைப் பருக எத்தனிக்கும் காகம் என பறவைகளைக் கண்ட காட்சிகள் மனதில் விரிகின்றன.

கிராமத்தில் வீட்டின் முன்புறம் உள்ள நூற்பாலையில் நிறைந்து கிடக்கும் மரங்களில் [தற்போது பெரும்பான்மையானவை வெட்டப்பட்டு கட்டிடங்களாக மாறிவிட்டன :( ] காலை ஐந்து மணிவாக்கில் பறவைகள் எழுந்து சத்தமிட்டுவிட்டு, மெல்ல மெல்ல உணவு தேடி அவை பல திசைகளில் பறந்துவிடும். ஊரை விட்டு வந்தபின்னும் பலகாலம் இப்பறவையொலிகள் காதில் விழும் பிரமை ஏற்பட்டுள்ளது. சொல்லி வைத்தாற்போல் மாலை அனைத்து பறவைகளும் இம்மரங்களுக்குத் திரும்பிவிடுகின்றன. மீண்டும் சிறிது நேரம் ஒலிமயம் (தங்களது அன்றைய அனுபவங்களைப் பேசிக்கொள்ளுமோ என்னவோ!). இவற்றில் பெரும்பான்மையானவை காகங்கள், மைனாக்கள், குருவிகள். கிளி, புறாக்களைப் பார்ப்பது எப்போதாவது நடக்கும். கூட்டமாக நெருங்கிப் பறக்கும் குருவிகளின் ஒருங்கிணைந்த வானவேடிக்கைக் காட்சிகள் ஒவ்வொரு முறையும் பிரமிப்பை ஏற்படுத்தும். ஒட்டுமொத்தமாய் வந்து ஒரு மரத்தை ஆக்கிரமிக்கும், பின்பு சில நிமிடங்களில் சர்ரென ஒன்றாய் மேலெழுந்து பறக்கும் இவற்றின் அழகினைச் சொல்வது அவ்வளவு சுலபமல்ல. இவை எதற்காக இவ்வாறு செய்கின்றன என்பது ஒரு புதிராகவே உள்ளது. இன்னும் பறவைகளைப் பற்றி எவ்வளவோ சொல்லிக்கொண்டே இருக்கலாம்.

பேசும் படங்கள்

World Press Photo அமைப்பு 2003-ம் ஆண்டிற்கான சிறந்த புகைப்படங்களைத் தெரிவு செய்துள்ளது. 2003-ன் தலைசிறந்த படத்தில் இடம் பெற்றிருப்பவர் ஓர் ஈராக் போர்க்கைதி, படம் பிடித்தவர் ஃபிரான்ஸ் நாட்டின் Jean-Marc Bouju. களச்செய்தி, பொதுச்செய்தி, செய்திகளில் மாந்தர்கள், விளையாட்டு, கலை, சமகாலத்திய பிரச்சனைகள், அன்றாட வாழ்க்கை, இயற்கை முதலான பத்து பிரிவுகளில் படங்கள் வகைப்படுத்தப்பட்டுள்ளன.

பரிசு பெற்ற பெரும்பாலான படங்கள் துயரமான சம்பவங்களின்போதே எடுக்கப்பட்டவையாக உள்ளன. மனதில் பல்வேறு அலைகளைத் தோற்றுவிக்கும் இப்படங்களுக்கு விளக்கங்கள் தேவைப்படாது. இந்தியா சம்பந்தப்பட்ட இருபடங்கள் சுவாரசியமானவை. நடுவர் குழுவில் ஸ்வபன் பரேக் என்ற இந்தியர் ஒருவரும் இருந்திருப்பது கூடுதல் செய்தி.

ஜெருசலேம் - அகமதாபாத்

ஜெருசலேம் நகரில் இன்று நடந்த பேருந்து தற்கொலைத் தாக்குதலுக்கு ஆளாகி பலர் மாண்டதாகச் செய்திகள் தெரிவிக்கின்றன. இதற்கு பாலஸ்தீனத் தீவிரவாதக் குழுவொன்று 'பொறுப்பும்' ஏற்றுள்ளது! இவர்கள் சொல்லும் காரணம் - ஓரிரு நாட்களுக்கு முன் இஸ்ரேலியப் படைகள் காஸா பகுதியில் நடத்திய 'தேடுதல் வேட்டை'யும் அதன் விளைவாக நடந்த சாவுகளும். இன்றைய பேருந்து நிகழ்வைக் காரணம் காட்டி இஸ்ரேல் மீண்டும் சில தாக்குதல்களைக் கண்டிப்பாக நடத்தும். 2000-மாவது ஆண்டு செப்டம்பரில் துவங்கிய இந்த சமீபத்திய கொந்தளிப்பு/அமைதியின்மை தாக்குதல்-பதில் தாக்குதல் என்று சொல்லி பல நூற்றுக்கணக்கான உயிர்களை இருதரப்பிலும் பலிவாங்கியுள்ளது, இன்னும் நிற்பதாகத் தெரியவில்லை. அமெரிக்காவின் 'அமைதி' முயற்சியிலும் சொல்லிக்கொள்ளும்படி எந்தவித முன்னேற்றமும் காணவில்லை. என்றுதான் இப்பிராந்தியத்தில் அமைதி திரும்புமோ!

இன்னும் சில நாட்களுக்கு இந்திய ஊடகங்களில் அகமதாபாத் நீதிமன்ற கையூட்டு விஷயம் பெருமளவில் இடம் பெறும். அப்புறம் எல்லோரும் மறந்து விடுவோம்! மறுபடியும் வேறெங்காவது 'இப்படி நடந்து' என்று செய்திவரும், 'ஓ அப்படியா' என்று சொல்லிவிட்டு அவரவர் வேலையைப் பார்க்க ஆரம்பித்து விடுவோம். தெகல்காவிற்கு நடந்த கதை அனைவரும் அறிந்த ஒன்றுதானே! நடப்பவைகளைக் கண்டால் சமுதாயத்தின் மீது நம்பிக்கை வருவேனா என்கிறது. :(

சதாம்?

அமெரிக்காவின் அந்நாளைய 'நண்பரும்' இந்நாளைய 'எதிரியும்' என்னவானார் என்று தெரியவில்லை. இதில் பரபரப்பு ஏதுமில்லாததால் ஊடகங்களுக்கும் அவ்வளவு ஆர்வமில்லை போலுள்ளது. கைது நாடகத்தின் படங்கள் சில காணக்கிடைத்தன.

போகி - பொங்கல்

ஊரில் வழக்கமாக போகிப் பண்டிகை நாளுக்கு முன்பே வீட்டை சுத்தம் செய்து, வெள்ளையடித்து முடித்திருப்பார்கள். இந்நாளன்று முக்கியமான ஒரு வேலை வீட்டிற்குக் காப்பு கட்டுவது. அக்கம்பக்கம் இருக்கும் வேப்ப மரங்களுக்கு வாயிருந்தால் அழுதே விடும், அந்த அளவிற்கு அதன் சிறு கிளைகள் ஒடிக்கப்பட்டுவிடும். வேப்ப இலைகளோடு பூழைப் பூக்குச்சிகள் வெள்ளையடித்த வீடுகளின் ஓட்டு இடுக்குகளில் அந்தி சாயுமுன் சொருகப்பட்டுவிடும். மாலை ஒவ்வொரு வீட்டிலும் வாசலை சாணத்தால் மெழுகி வண்ணக் கோலங்களால் நிரப்புவார்கள். வருடங்களாயிற்று இவற்றையெல்லாம் பார்த்து!

இப்போது போகிப் பண்டிகையைக் கொண்டாடுவதாகச் சொல்லிக் கொண்டு ரப்பர் டயர்கள், பிளாஸ்டிக் கழிவுப் பொருட்களை எரித்து விமானப் போக்குவரத்தையே சற்று பாதிக்குமளவிற்கு செய்துவிட்டதாம் சென்னையில் ஒரு கூட்டம்! (நேற்றைய thatstamil.com-ல் வந்த செய்தி). அபத்தங்களுக்கு அளவில்லாமல் போய்விட்டது.

பொங்கல் நாள் பெரும்பாலும் வெறுமனே கழியும், இல்லையென்றால் உறவினர்/நண்பர் யாராவதின் தோட்டத்திற்கு மாட்டுப் பொங்கல் கொண்டாட பயணிப்போம். இந்நாளை ஒட்டிய பல நிகழ்ச்சிகள் நினைவுக்கு வருகின்றன.

இனிய பொங்கல் வாழ்த்துகள்!