Indira Gandhi: The Killing of Mother India

குழந்தைகளுக்கு அம்மாக்கள் நிலாவைக் காட்டிச் சோறூட்டிய காலமெல்லாம் மலையேறிவிட்டது. இங்குள்ள மந்தார வானிலையில் நிலாவை எங்கே போய்க் காண்பது? தூறும் மழைக்கு வெளியில் சென்று நின்றால் உடம்பு விறைத்தேவிடும் போலுள்ளது. சாப்பிட வைக்க எதையாவது செய்ய வேண்டுமே! நிலாவின் இடத்தை தொலைக்காட்சிப் பெட்டி எடுத்துக்கொண்டது. ஒளியும் ஒலியுமாக இருக்கிற காட்சிகளுக்குத்தான் குழந்தையிடம் மதிப்பு உண்டு, மற்றவையெல்லாம் கண்டுகொள்ளப்படுவதில்லை! ஏதாவது பாடல் அல்லது விளம்பரத்தைப் பார்த்து மகள் நிற்கும் நேரத்தில் அவள் வாயில் ஊட்டிவிடுவாள் தாய். இன்று தொலை இயக்கியில் ('ரிமோட் கன்ட்ரோலு'க்கு இப்படி ஒரு சொல்லை எப்பொழுதோ படித்ததாக நினைவு; 'ரிமோட் கன்ட்ரோல்', 'ரிமோட்டா'கச் சுருங்கியதைப்போல், தொலை இயக்கிக்குச் சுருக்கமாகத் 'தொயிக்கி' என்றேன் மனைவியிடம், சிரிக்கிறாள்!) காட்சிகளை மாற்றும் வேலை தந்தைக்கு!

அப்படிக் காட்சிகளை மாற்றிக் கொண்டிருக்கும் சமயத்தில் ஆங்கிலமல்லாத ஓர் அலைவரிசையில் இந்தியா சம்பந்தப்பட்ட நிகழ்ச்சி ஓடுவதுபோல் தெரிந்தது. சில விநாடிகள் தொடர்ந்து பார்த்த போது அது இந்திரா காந்தியைப் பற்றிய ஆவணப்படமாக இருந்தது. அவ்வளவாகத் தெரியாத மொழியாகையால் படங்களை மட்டுமே காண வேண்டியதாயிற்று, ஏற்கனவே கொஞ்ச நேரம் ஓடிவிட்டிருந்தது. பிற்பாடு அவ்வலைவரிசையின் தொலையுரைப் (teletext) பக்கங்களைச் சென்று பார்த்தபோது, அது பிபிசி நிகழ்ச்சியின் மொழிபெயர்ப்பு என்று தெரியவந்தது. இந்திய சுதந்திரப் போராட்டக் காட்சிகள், காந்தி, நேரு, காமராஜ், சஞ்சய் காந்தி, ராஜீவ் காந்தி போன்றோரது காட்சிகளுடன், இந்திராவின் அந்தரங்கக் காரியதரிசியாக இருந்த ஆர்.கே.தவான், ஷீலா தீக்ஷித், குஷ்வந்த சிங், ஐ.கே.குஜ்ரால், பிபிசியின் அந்நாளைய இந்திய செய்தியாளர் முதலானோரின் பேட்டிகளும் இடையிடையே வந்தன.

வரும் 31ம் தேதியுடன் இந்திரா காந்தி இறந்து 20 வருடங்களாகின்றன. அதைக்குறிக்கும் வகையில் எடுக்கப்பட்ட படமாம். நிக் ரீட் என்பவர் பிபிசிக்காக இந்நிகழச்சியை உருவாக்கியுள்ளார். ஒரு மணி நேரம் சற்று கூடுதலாக இருக்கும் இந்த ஆவணப்படத்தின் தலைப்பு "Indira Gandhi: The Killing of Mother India". இப்படத்தைப் பற்றிய விரிவான அறிமுகம் ஒன்றை இங்கே காணலாம்.

இக்காலத் தலைமுறைக்கு இந்திரா காந்தியைப் பற்றி அறிந்து கொள்ள இச்சிறு படம் ஒரு நல்ல வாய்ப்பு. ஆங்கிலத்தில் கிடைக்கும் போது இதை மற்றொரு முறை பார்க்க வேண்டும். நம்மூர் தொ.கா.க்கள் பிபிசியிடமிருந்து இதை வாங்கி அப்படியே ஆங்கிலத்திலோ அல்லது உள்ளூர் மொழியில் ஆக்கம் செய்தோ ஒளிபரப்பலாம்.